क्षण एक पुरे प्रेमाचा!

जीवनातला प्रत्येक दिवस
म्हणजे थोडं थोडं मरण्याच,
त्या मरणाचा आनंद लुटण्यासाठी
क्षण एक पुरे प्रेमाचा!

रोजच्याच त्या दुखांसाठी
येतो कंटाळा रडण्याचा,
त्या दुखाना सामोरं जाण्यासाठी
क्षण एक पुरे प्रेमाचा!

दरवेळी प्रेमभंग होतो
तरीही प्रयत्न सतत हसण्याचा,
प्रेमाच्या शोधात भटकण्यासाठी
क्षण एक पुरे प्रेमाचा!

प्रत्येक स्वप्न पूर्ण होत नाही
तरीही छंद स्वप्ने पाहण्याचा,
स्वप्नांना वास्तवात आणण्यासाठी
क्षण एक पुरे प्रेमाचा!

त्या एका सोनेरी क्षणासाठी
मी ऋणी आहे तिचा,
तिला भरपूर प्रेम करण्यासाठी मात्र
क्षण एक न पुरे प्रेमाचा!